公司會唔會無啦啦 check 我份信貸報告?

Blog Post05/26/2022
求職
公司會唔會無啦啦 check 我份信貸報告?

Sharon 只要了解多少少資訊,就會知道完全唔需要擔心,因為除了你本人可以 check 到自己的信貸報告,其他人或機構都必須取得你的授權同同意,先可以 check 到你的信貸報告。

 

Sharon 的網購公司喺新冠疫情的逆境之下突圍而出,仲越做越大,最近更加被大公司睇中收購埋,前景非常之好。但 Sharon 好擔心,因為公司嚟緊要跟足母公司規矩做事,其中有一條係請人時要睇埋準員工的信貸報告。Sharon 的信貸評分其實差到連信用卡都申請唔到,她好擔心母公司會 check 晒所有現有員工的信貸報告,畀人照肺事少,最怕有人知道她欠落咁多卡數咁就無面啦!

其實 Sharon 只要了解多少少資訊,就會知道完全唔需要擔心,因為除了你本人可以 check 到自己的信貸報告,其他人或機構都必須取得你的授權同同意,先可以 check 到你的信貸報告。

咩情況下會要你授權 check 信貸報告?

當你填表申請信用卡、按揭、貸款等信貸行為時,大部份信貸提供機構都會有一個條款,要你授權對方 check 你的信貸報告,以了解你的信貸狀況;另外,現時亦越嚟越多公司請人時會想睇埋應徵者的信貸報告,尤其是從事金融業、保安、紀律部隊等對誠信要求較高的行業,或者一些掌握財務同埋敏感資料的工作崗位;仲有,美國、英國、澳洲同埋部分歐洲國家的入境機關,有時都會要求移民申請人提供信貸報告。

不過,值得一提的是,信貸報告有分自己 check 同其他人取得你授權去 check 的版本,自己 check 而攞到手的版本會有晒你所有資料,而由你授權畀其他人 check 的,上面就唔會有你的個人私隱資料,例如信用卡號碼等等。所以,如果有公司要求由你去提供自己的信貸報告,那就要考慮清楚個人私隱外泄的風險啦!

改善信貸評分至為重要

簡而言之,你可以 check 自己的信貸報告,但其他人無你的授權,係絕對無可能攞到你份信貸報告。不過,信貸評分唔好,唔多唔少都對生活有影響,輕則好似 Sharon 咁申請唔到信用卡,重則可能影響事業、移民等人生計劃。所以,建議大家要正視自己的信貸評分,可以先 check 下自己的信貸報告,針對自己的信貸狀況慢慢去改善,將來就唔會一頭煙。

 

【延申閲讀:見工時 HR 話要 Check 我 TU

【延申閲讀:被裁員後見工 應否坦白離職原因?

【延申閲讀:過到面試過唔到reference check?背景調查常見破綻大公開

 

 

 

本網站內容乃僅為資訊性質用途而提供,而並無意圖向閣下提供財務意見及閣下不應依賴內容提供任何該等意見。關於網站所提供任何內容的評估及核實,以及在任何情況下,在基於該等內容作準而做出任何財務決定之前,閣下務必尋求專業人士的意見。環聯在提及第三方網站或其中的內容時(包括但不限於信息、數據、產品、實體或個人),並不構成環聯對其内容的認可或推薦。創作者或其他人士在第三方網站中所發表的觀點純屬個人意見,並不代表環聯立場。環聯並未檢查或驗證第三方網站的內容,也並非贊同及不會承擔此類網站的內容及其使用的責任。 如您對此免責聲明有任何疑問,請聯繫我們的法律部門。

你知道自己的信貸狀況嗎?  由今日起開始監察自己的信貸狀況